Carpon Sunda - Si Kabayan Jeung Profesor

SI KABAYAN JEUNG PROPESOR

Ku :  De Shandy

Di lembur Bojong Rangkong, kacaritakeun kadatangan hiji propesor ti Amerika nu keur ngayakeun panalungtikan. Éta Propesor téh nyatana jelema nu geus kaceluk ka jamparing angin-angin ka sakabéh nagri ngeunaan kapinteranana nu méh ampir sampurna. Pinter dina sagala widang élmu pangaweruh. Mun ceuk basa légégna mah, ‘eta Propesor téh minangka guruna sakabéh propesor nu aya di ieu dunya. Kituna téh, kapinteran éta propesor geus katara ku urang Bojong Rangkong sorangan nu minangka geus ngajawab kana kabéh pertanyaan nu kungsi ditanyakeun ku urang Bojong Rangkong sorangan, kalayan jawabanana nu nyugemakeun turta bener kabéh.

Tapi orokaya teu kabéh jelema nu aya di lembur Bojong Rangkong sorangan nu panuju kana kaunggulanana éta Propesor. Aya hiji lalaki nu ngarasa cangcaya kana kapinteranana éta Propesor. Taya lian éta lalaki téh ngaranna si Kabayan. Teu lila, kalayan aya niat rék ngetés tur ngadu pangaweruh jeung éta Propesor, nya Si Kabayan terus indit ngajorag éta Propesor  di tempat panalungtikanana.

Di hiji tempat, katara si Propesor nu keur anteng jeung bahan percobaanana. Kalayan keur digimbung ku jalma-jalma di sakurilingeunana nu sasatna ngarasa takjub kana kapinteran éta propesor.

“Sampurasun, tuan Propesor” Si Kabayan unjukkan ka éta Propesor.

“Iya, ada yang bisa saya bantu tuan?”  Tembal éta Propesor.

“Sumuhun tuan Propesor” Si Kabayan bari sok terus ngasrongkeun leungeunna, disusul ku leungeun Propesor. Maranéhna terus sasalaman.

“Ada apa tuan?” Tanya éta Propesor bari sok terus ngaleupaskeun leungeunna.

“Muhun, aya hiji pertanyaan nu rék ditanyakeun ka tuan Propesor”

“Oh begitu ya. Kalo boleh saya tahu, apa pertanyaanmu itu? Katakan saja, pasti saya akan menjawab semua pertanyaanmu itu?” Tembal si Propesor nu pinuh ku kayakinan kana kamampuanana. Kituna, éta Propesor téh nganggap ka si Kabayan ukur jalma kampung nu saeutik pangaweruhna. Tangtu pertanyaanana ogé nu moal sabaraha. Pasti manéhna bisa ngajawab kana éta pertanyaan si Kabayan, pikir éta Propesor.

“Percanten ka tuan Propesor mah,” Ceuk si Kabayan rada nyungkun.

“Ngan saméméhna kuring rék ménta dihampura ka tuan Propesor”

“Memangnya kenapa?” Tanya éta Propesor teu ngarti kana maksud nu diomongkeun ku si Kabayan.

“Sumuhun, saurna tuan Propesor téh jalma nu pangpinterna di ieu dunya. Sasatna mah jalma nu pinuh ku élmu pangaweruh, loba ku panalar, jeung sugih ku pangarti”

“Memang benar. Seluruh dunia sudah mengakui semua itu. Jika kamu masih ragu dengan kepintaranku itu, kamu bisa mengujinya sekarang.” Ceuk si Propesor rada légég.

“Nya ari kitu mah kuring ngiluan sakumaha kahayang tuan Propesor. Ngan saméméhna kuring boga paménta?”

“Apa permintaanmu itu?” Tanya si Propesor.

“Mun dimana-mana tuan Propesor teu bisa ngajawab kana pertanyaan kuring, tuan Propesor kudu ngayakeun duit nu lobana saratus rebu, minangka bayaran teu bisa ngajawab kana pertanyaan kuring”

“Oh tentu. Lagipula pasti saya akan bisa menjawab semua pertanyaanmu itu. Terus kalau kamu sendiri tidak bisa menjawab pertanyaanku, apa yang bisa kamu berikan kepadaku?”

“Kuring bakal mayar tuan Propesor sagede sapuluh rebu. Kumaha? Sarat nu adil lain? Minangka tuan Propesor mah jalma pinter, luhur kuta gede dunya, sigana teu sabaraha lin mikeun duit saratus rebu mah ka kuring nu sasatna jalma bodo, sangsara balangsak, jeung nu pasti mah lain Propesor siga anjeun” ceuk si kabayan rada meuli hate éta si Propesor.

Si propesor saheulanan mikir kana pananjak nu diajukeun ku Sikabayan. Tapi teu lila, si Propesor tuluy nyanggupan kana kahayangna si Kabayan. Si Kabayan katingali ukur mesem barang si Propesor satuju kana panajakna.

“Ari nu jadi pertanyaan kuring mah kieu tuan Propesor,” Ceuk si kabayan ngamimitian nanya.

“Bagaimana, ayo ceritakanlah’

“Jaman baheula, aya hiji Propesor nu rék ngayakeun panalungtikan di hiji pulo di tengah-tengah lautan. Tapi nasibna nu teu marengan. Di tengah-tengah perjalanan, éta parahu nu dipaké ku si Propesor karam keuna kanu batu karang nepi ka tibalikna. Tangtu wé éta Propesor sorangan ti teuleum di tengah-tengah lautan. Pondok carita, éta Propesor kasered-sered ku ombak nepi ka kaperengkeun aya di hiji pulo karang  nu aya di tengah-tengah laut nu satungtung deuleu. Teu katingali aya daratan hiji-hiji acan. Kitu deui tatangkalan euwueuh sarupaeun. Nu aya téh ukur batu-batu karang nu tareruas saampar pulo, euweuh pupurieunana.”

“Terus?” Tanya si Propesor bangun nu panasaran.

“Ari nu jadi pertanyaan kuring mah, kumaha carana éta Propesor sangkan bisa indit ti éta pulo karang?”

“Ah gampang atuh éta mah” Ceuk si Propesor bangun nu yakin kana pijawabeunana.

“Kumaha?” Tanya si Kabayan.

“Tingal telepon saja, minta dilacak dan dijemput ke pulo karang tersebut. Kan sudah ada HP”

“Hehe…” Si Propesor siga nu tuluy bingung ningali tingkah si Kabayan nu sok terus seuserian barang ngadéngé jawaban manéhna.

“Ah, tuan Propesor mah ngalucu waé. Kapan caritana ogé jaman baheula, dimana atuh geus usum HP, telepon kabel ogé can tangtu aya”

Katingali si Propesor nu terus uleng mikir. Rada lila ayeuna mah mikirna téh. Tapi kudu dikumahakeun deui, nya manéhna keukeuh teu manggih pijawabeunana. Nya ahirna éta Propesor nyerah ogé.

“Aku tidak bisa menjawab pertanyaanmu itu” Ceuk si Propesor nu bari terus ngaluarkeun duit sapuluh rébuan sapuluh siki tina jero loketna. Sok terus diasrongkeun ka Si kabayan. Ngan orokaya waé jalma-jalma nu aya disakurilingeunana jadi ngilu mikiran kana éta pertanyaan nu diajukeun ku si Kabayan. Tapi tetep wé lebeng, taya hiji ogé jalma nu bias ngajawabna.

Teu lila si Propesor malik nanya ka si Kabayan, “Nah sekarang giliranku yang bertanya kepadamu, bagaimana caranya si Propesor itu bisa pergi dari pulo karang tersebut?”

Si Kabayan sorangan ukur mesem barang ngadéngé pertanyaan si Propesor.

“Maksudmu…” Tanya si Propesor. Teu lila si Kabayan terus masrahkeun salambar duit sapuluh rebuan ka éta Propesor bari nu salapan lambar deui mah sok tuluy diasupkeun ku manéhna kana jero saku bajuna.

Bari pokna téh, “Tong boro kuring nu sasatna jalma bodo, dalah Propesor gé nu ngaku jalma pangpinterna di ieu dunya teu bisa ngajawabna” Ceuk si kabayan nu tuluy ngingkig balik ti éta tempat. Diiring ku olohokna jalma-jalma nu aya di éta tempat.